Flee fro the prees and dwelle with sothfastnesse;
Suffyce unto thy thing, though it be small,
For hord hath hate, and climbing tikelnesse,
Prees hath envye, and wele blent overall.
Savour no more than thee bihove shal,
Reule wel thyself that other folk canst rede,
And trouthe thee shal delivere, it is no drede.
Tempest thee noght al croked to redresse
In trust of hir that turneth as a bal;
Gret reste stant in litel besinesse.
Be war therfore to sporne ayeyns an al,
Stryve not, as doth the crokke with the wal.
Daunte thyself, that dauntest otheres dede,
And trouthe thee shal delivere, it is no drede.
That thee is sent, receive in buxumnesse;
The wrestling for this world axeth a fal.
Here is non hoom, her nis but wildernesse:
Forth, pilgrim, forth! Forth, beste, out of thy stal!
Know thy contree, look up, thank God of al;
Hold the heye wey and lat thy gost thee lede,
And throuthe thee shal delivere, it is no drede.
Therfore, thou Vache, leve thyn old wrecchednesse;
Unto the world leve now to be thral.
Crye him mercy, that of his hy goodness
Made thee of noght, and in especial
Draw unto him, and pray in general
For thee, and eek for other, hevenlich mede;
And trouthe thee shal delivere, it is no drede.
The 7 Chakras Of The Body, Chakra 5 Lyrics performed by Mannheim Steamroller are property and copyright of the authors, artists and labels. You should note that The 7 Chakras Of The Body, Chakra 5 Lyrics performed by Mannheim Steamroller is only provided for educational purposes only and if you like the song you should buy the CD